Mi dumannu- “ Chi mi sta succirennu? di notti u griddu nan fà cri-cri-cri di jornu a cicala fri-fri-fri e penzu- “ Ma unni stamu Jennu?
A sveglia na nfà chiù ddu tichi-tachi nne mura na vidu i passiaturi mancu nne campagni i travagghiaturi ma carrìcu tanti sporti di pacchi.
Nno celu ci sunu picca rinnini haiu ‘ncasa mia du’ televisura na canzuna nan sentu nni sti mura né fora bummaliari i fimini.
C’è u petroliu chi chiù nna nni vogghiu ciaiu u pani nna cesta e u vini nna butti nan ci su carusi chi scarpi rutti e mi conzu a pasta cu sali e l’ogghiu.
Chi mi sta succirennu? Boh! Non sacciu bivu tutti i jorni acqua frisca mi scurdaiu sa chi è a mula e a brusca e mangiu pani cu salami e cacciu.
Sugnu maestru e puru littiratu ‘ngigneri e studiu a radiottività nan capisciu dda nostra castità leggiu e mi tegnu aggiurnatu.
E na dicu scurità, ma black out ô ciramu vidu a culuri u trilling e ‘ncampagna sulu mi fazzu u footing. Ha! Nan dicu catastrofi, ma full out.
I carusi nan fanu chiù bibi a tivvù a scangianu p’a mammà babbo o babbu chiamanu a so’ papà e nne pannolini fanu a pipì.
Nan sentu fari a gaddina co-co ddu treninu di na vota tu-tu a piula nni l’arbulu cu-cu a vicchita nna strata puripò.
Nan sacciu chiù sa chi pinzari e chi haiu mancu u puddicinu fa piu-piu l’aucceddu ‘nfriddulitu ciu-ciu ma sugnu, ‘nterra nno celu unna staiu? Aoh! Ma chi ste facennu, ste sparrannu? megghiu chi ritornu nna società ca me ragiuni e ca serietà pinzannu a chiddu chi diciva u nannu.
… ‘Ntantu u gaddu nan fa chichirichì u porcu ca funcia nan fa ngru-ngru mi manca tantu cumpari fru fru e di notti mi dumannu u prichì”.
