DISCURSU PERSU CU GUIDU TURINU





Ora parru a tia Guidu Turinu
prichì è caputu sii gilusu
pi ddu sunettu di intra furiusu
chi iu scrissi a Conzuli Fulippinu.
Mi sentu ‘n-sonu all’avricchia chi dici:

“Prisidenti dô Centru Culturali
iu finu cu l’arbulìti e l’armali
nuddu mi penza e nan sugnu di pici”.

Viramenti,. tu sai , sa chi penzu dicu:
“Ddi arbuliti chiantati ô Spizziu
non sacciu si pi amuri o pi sfizziu
notizia fu p’u giurnali criticu.

A “Rotonda” ddi arbuliti lassati
ddi quattru fotografii a culuri
di mattina scattati cu rancuri
ô nostru Sinnacu funu mannati ,

e puru nno giurnali stampati
d’a Pruvincia passànu ‘u cunfìnu
cu tò nomu scrittu Guidu Turinu
e i tò senzi funu, penzu, saziati”.

Pi stu paìsi, ogni cosa chi tu fai
si tratta di munnizza o di nenti
voi chi tutta a genti ti teni ‘n-menti
e ‘u giurnali passari pò puru guai.

Iu pinzava chi già sìi famusu
ô cuntrariu di cumpà Fuluppinu
chi ‘n-fotografia a nui teni ‘n-fistinu
cu picca gloria, e cu cori fucusu.

Scusami ‘stu parrari e ‘sta critica
prichì sacciu chi voi beni ‘u paìsi
ma ognunu fa ‘i nostri maìsi
zappànnu ‘u tirrènu, o c’a pulitica.

E accussì ‘rruvamu ô veru puntu
chi è chiddu chi ti fa stari mali
prichì, certu, nan penzi sulu i maiali
e cuntinuamu ‘u nostru longu cuntu.

Dici chi è Maccari nan c’è nenti ( Maccari= Mirabella Imbaccari)
curpa dô Sinnàcu amministraturi
prichì carusu sceccu currituri
e sulu iddu menti pagghia nne denti.

E ha lassatu ‘u paiseddu vacantu
‘n-quantu giuvani senza chiù spiranza
vannu ô Nord o ‘n-Germania p’a mattanza
e strati lucica di niru mantu.

Ma tu chi passasti a sissantina
e rigordi n’hai chiù d’iddu e di mia
sai chi è ‘na minchiata, o fissarìa
quannu ti rivigghiunu di mattina.

Prichì mé nannu fu in Argentina
mé patruzzu partivu p’a Germania
p’u travagghiu ci vinni tanta smania
e ‘i figghi vidivanu ‘n-cartulìna. .



Iu non sacciu cu cumannava tannu
dimucratici, fasciu o cumunisti
genti vecchia, nobbili o qualunquisti
fattu sta, c’a genti mannavu ô scannu.

Ora, vidi, ‘a storia è sempri ‘a stissa
c’è tanta cultura e televisioni
e i sturenti comu tanti straccioni
‘migranu comu ddi so’ nanni fissa.

Sai prichì? Simu boni pi parrari
cumpresu ddi picca nobbili e ricchi
chi si sentunu tanti sceicchi
e è poveri su’ boni a criticari:

“Pi stu paìsi nan fa nenti ‘a genti
nan sa pinzari prichì è gnuranti
pi forza chi poi diventa ‘migranti”.
Turinu, sti cosi puru tu ‘i senti?

E i poveri - penzanu ddi babbìuni:
“Ma ch’i sordi chi fanu? ‘I cuntanu
mattina e sira e àma jiri luntanu
p’u ‘n-pezzu di pani a ‘jiunicchiuni: :







‘U figghiu dô dutturi è dutturi
‘u figghiu di l’avvucatu, avvucatu
e sta ‘n-casa so’ beddu stinnicchiatu
‘ccussì puru ‘i figghi dô prufissuri

e a tutti nui ‘u travagghiu cu ciù duna?
Mangianu , sperti, e spadditi dô Statu
a quattru argi e chi sordi mìsi ô latu
e p’u panuzzu àma fari a muttuna.

‘Gnuranti , pi nenti ‘mprinditoriali
prichi è già sapìri universali
ch’ì ricchi , mentunu ddu materiali
pi farinni ricchizza nazziunali

e puru chi si leggiunu giurnali
libbri di storia e sociologia
pigghianu tuttu c’a filusufia
e vonu ‘i cuntributi cumunali”.



Guidu , ma i ricchi tu sai chi fanu?
Mai su’ nni ‘na festa, pi via o ‘n-chiazza
ma si pigghianu ‘n-casa ‘u caffè ‘n-tazza?
e è Maccari bar nan ci ni stanu?

Oppuru, cuntu vonu dari a nuddu
datu chi nan sunu amministraturi
prichì c’è ‘stu carusu currituri:
Ssi cosi mi cuntava m-pari puddu.

Chi vai spirannu nni stu paiseddu
chi già ‘ssumigghia e Maccari Supranu
ma ‘i tò du’ figghi nan voi luntanu
pi criscitìli sutta ‘u tò manteddu.

Cu ssi tistazzi chi nui nni truvamu
tu, hai a vogghia di stari a chiazza chiazza
fariti vidiri spertu e di razza
pi diri: “I cumpagni cu tutti stamu.”

Prichì a custioni miridiunali
è un fattu storicu e seculari
chi nè tu né iu putìmu luvari
comu semprici ‘m-piegati statali.

Sai, ormai puru iu mè rassegnatu
e mi passu ‘u tempu a scrivacchiari
pi sentimi ‘sta arma libbirari
tantu nni sugnu siddiatu e sdignatu

‘Stu paìsi ‘u vidu sempri accussì
e tu, cridu, è capùtu ‘u prichì:
Du’ chisitti
du’ casitti
du’ chiazzati
du’ stratiti.
un Cumuni
du’ lampìuni.
du’ cugghiuni.


Giuseppe Bonura